Traust og öryggi
Það sem fylgir hverju verki
Hér er nánar sagt frá eignarhaldi, reglunum sem fylgja hverri lausn, öryggi og persónuvernd, mælingu árangurs og óhæði mínu. Smáatriðin standa í handbókinni sem viðskiptavinir fá og í verksamningnum.
Eignarhald
Hugbúnaður sem þið eigið
Kóðinn, lyklarnir og öll umhverfi eru ykkar frá fyrsta degi. Þið eruð hvorki bundin mér né neinum tækniseljanda. Ég vil heldur ekki að þið farið úr einni seljandalæsingu (vendor lock-in) í aðra. Þið eigið að geta skipt um líkan, þjónustu og ráðgjafa þegar betra býðst.
Allt á ykkar nafni
Kóðasafn, skýreikningur, gagnagrunnur, lyklar, öpp og atvikaskrá eru stofnuð á ykkar nafni.
Opin tækni
Til dæmis opni gagnagrunnurinn PostgreSQL og MCP, opinn staðall fyrir tengingar við gervigreind. Ég nota það sem hentar ykkur. Að skipta um líkan eða skýjaþjónustu er stillingaratriði.
Þið fylgið tækninni
Þegar betra líkan eða ódýrari þjónusta býðst skiptið þið. Hver lausn sem notar líkan getur haft varalíkan frá öðrum framleiðanda sem er prófað reglulega.
Þið haldið áfram án mín
Útgöngupróf sýnir að ykkar fólk eða UT-þjónustuaðili ykkar getur rekið allt, breytt því og endurheimt það án mín. Ef útgöngupróf sýnir að eitthvað krefst minnar aðkomu laga ég það án endurgjalds, eins og segir í verksamningnum.
Reglur
Reglur sem fylgja hverri lausn
Það er áhætta að leyfa gervigreind að gera hvað sem er. Þegar lausn fær aðgang að gögnunum ykkar, hvort sem það er erindreki eða tenging, gilda þessar reglur frá fyrsta degi og standa í samningnum. Þið fáið reglurnar líka sem innra eftirlit, á sniðmáti sem stjórn og endurskoðandi þekkja.
Aðeins lesaðgangur í upphafi
Lausnin sér aðeins þau gögn sem þið hafið samþykkt.
Heimildir vinnast með reynslu
Í upphafi samþykkir manneskja hvert skrif. Greiðslur og samninga samþykkir alltaf nafngreind manneskja.
Ykkar eigin reikningar
Lyklar, gögn og líkan eru á reikningum sem þið eigið.
Texti utan frá er gögn
Það sem kemur inn í pósti eða af vef getur aldrei skipað lausninni fyrir.
Hver aðgerð er skráð
Atvikaskrá sem þið geymið og getið sýnt stjórn, endurskoðanda eða Persónuvernd.
Þið getið stöðvað hana strax
Hverja lausn má stöðva strax án þess að hringja í mig.
Öryggi
Netöryggi, upplýsingaöryggi og persónuvernd
Ég bar ábyrgð á upplýsingatækni og upplýsingaöryggi í fjármálafyrirtækjum undir eftirliti. Öryggið hjá ykkur tekur mið af því sem er í húfi.
Aðgangur og dulkóðun
Hver lausn og hver notandi fær aðeins þann aðgang sem verkið krefst, með fjölþátta auðkenningu. Lyklar eru í lyklageymslu og gögn eru dulkóðuð.
Persónuupplýsingar
Þið eruð ábyrgðaraðili. Þar sem lausn vinnur með persónuupplýsingar gerum við vinnslusamning og mat á áhrifum á persónuvernd áður en hún fer í gang.
Atvik
Ef eitthvað fer úrskeiðis fáið þið strax að vita hvað gerðist og hvað var gert.
Hvar gögnin eru
Allt sem við smíðum og geymum er í ykkar eigin kerfum. Líkanið keyrir til dæmis hjá Amazon Web Services innan Evrópu, á ykkar eigin reikningi. Þá er AWS vinnsluaðili og Anthropic hefur engan aðgang að fyrirspurnum eða svörum. Reikningurinn er stilltur svo ekkert sé geymt og gögnin ykkar eru aldrei notuð til þjálfunar.
Mæling
Árangur sem þið getið sýnt
Í krónum þar sem það er hægt og tölurnar eru bornar saman við bókhaldið. Þar sem það er ekki hægt notum við mælikvarða sem þið treystið.
- Grunnlína
Byggð á sögu ykkar og borin saman við eftirspurn í landinu, svo árstíðasveiflur trufli ekki mælinguna.
- Samanburður
Þar sem hægt er fer lausnin í gang í áföngum. Það sem ekki var snert sýnir hvað hefði gerst hvort eð er.
- Tími
Sparaður tími er aðeins talinn í krónum þegar hann sparar raunverulegan launakostnað.
- Skýrsla
Ein blaðsíða á mánuði, borin saman við uppgjör og bókhald.
Óhæði
Fimm spurningar sem þið ættuð að spyrja hvern ráðgjafa
- Hver borgar þér?
- Aðeins þið, samkvæmt samningi og reikningi. Engin söluþóknun, engin tilvísunargjöld og engin álagning frá neinum seljanda.
- Er þér borgað fyrir að kynna einhverja vöru?
- Nei. Ég fylgist með tækninni hjá öllum helstu seljendum, en enginn þeirra borgar mér neitt.
- Færðu eitthvað ef við veljum annað tól eða smíðum sjálf?
- Nei. Ég fæ aðeins greitt fyrir mína vinnu, hvaða leið sem þið veljið.
- Seturðu valkosti á blað?
- Já. Hver tillaga um að kaupa eða smíða nefnir valkostina sem voru skoðaðir og hvers vegna þeir urðu undir.
- Myndirðu ráðleggja okkur að gera ekkert?
- Já, þegar það er rétta svarið.
Hafa samband
Viltu vita meira?
Ég fer yfir þetta með ykkur á fyrsta fundi. Hann er ein klukkustund og kostar ekkert.